दिपेन्द्र कार्की बस्ताकोटी, दैलेख
१३ जेठ,२०८२
कर्णाली प्रदेशको डोल्पा जिल्लाका प्रमुख जिल्ला अधिकारी रोम बहादुर महतले भौगोलिक विकटताका कारण समग्र जिल्लाको सेवाप्रवाह र सुरक्षामा चुनौति रहेको बताउनुभएको छ । प्रजिअ महतले टिभि टुडे टेलिभिजनसँगको कुराकानीमा नेपालकै ठुलो क्षेत्रफल भएको र सबैभन्दा विकट जिल्लाको रुपमा रहेको डोल्पाका विभिन्न ८ वटा स्थानिय तहहरुमा सुरक्षामा चुनौति संगै सेवाप्रवाह सामान्य रहेको बताउनुभएको छ । यतिबेला समग्र डोल्पा जिल्लाका अग्ला पाटनक्षेत्रमा यार्सा संकलनको समय भएकाले यतिबेला बढि सुरक्षा चुनौति थपिने गरेको समेत बताउनुभयो । यार्सा संकलनको क्रममा भौगोलिक विषयलाई लिएर झडप समेत हुने गरेको सन्दर्भ उठान गर्दै प्रजिअ महतले नेपाली सेना र शसस्त्र प्रहरी समेत परिचालन गर्नुपरेको बताउनुभयो ।
कुराकानीको क्रममा प्रजिअ दाहालले यतिबेला डोल्पा जिल्ला २ भागमा रहेको र मौलिक परम्परालाई लिएर आफ्नै नियम कानुन समेत रहेकोमा प्रहरी प्रशासन भन्दा सामाजिक मुल्य मान्यतालाई अगाँल्ने गरेको समेत बताउनुभयो । उहाँले सडक सञ्जाल सहज नभएका कारण नागरिकहरु जटिल बिरामी हुँदा हेलिकप्टर मार्फत उद्धार गर्न समेत महंगो र चुनौतिको विषय रहेको समेत बताउनुभयो ।
माथिल्लो डोल्पा र तल्लो डोल्पा भनेर मुख्य २ भागमा रहेको डोल्पा जिल्ला उत्तर चिनसँग सिमाना जोडिएको जिल्ला समेत भएको सन्दर्भमा माथिल्लो डोल्पाका केहि स्थानिय तहहरुको समग्र सेवाप्रवाह समेत सदरमुकाम दुनै केन्द्रित हुने गर्दछ ।
