च्याल्टी ।  बेथानचोक गाउँपालिकाद्वारा आयोजित अन्तर आधारभूत तहस्तरीय हाजिरीजवाफ तथा चित्रकला प्रतियोगिता सम्पन्न भएको छ ।

वडा नं. ५ मा रहेको आत्मा विकास माध्यमिक विद्यालयको संयोजनमा कक्षा ६ देखि ८ सम्म सञ्चालित हाजिरीजवाफमा पार्वती मा.वि. प्रथम कृष्ण गोपाल मा.वि. द्वितीय एवम् भूमिमाता मा.वि. तृतीय भएको छ । यस्तै चक्रेश्वर मा.वि.ले सान्त्वनामा चित्त बुझाएको छ । यस्तै चित्रकला ( कक्षा १–५) तर्फ पार्वती मा.वि प्रथम भएको छ भने भीमसेनेश्वर मा.वि., द्वितीय, सरस्वती मा.वि. भुग्देउ तृतीय भए । गोरखनाथ प्रा.वि.ले सान्त्वना स्थान हासिल गरेको छ । कार्यक्रममा विजयीहरुलाई पुरस्कार एवम् प्रमाणपत्र वितरण गर्दै बेथानचोक गाउँपालिकाका अध्यक्ष भगवान अधिकारीले पालिकास्तरमा हुने यस प्रकारका प्रतिस्पर्धात्मक प्रतियोगिताले बेथानचोकका विद्यार्थीहरु देशैभरका ७ सय ५३ वटै पालिकामा रहेको विद्यार्थीसँग प्रतिस्पर्धा गर्न सक्षम हुने बताउनु भयो ।

उहाँले अभिभावकहरुसँग कार्यक्रमहरु सुझावका रुपमा माग्दै रचनात्मक कार्यक्रमहरु शैक्षिक क्यालेण्डर बनाएर अघि बढ्ने बताउनु भयो । उहाँले विद्यार्थीलाई सैद्धान्तिक ज्ञान मात्र नभई व्यवहारिक शिक्षा पनि प्रदान गर्नुपर्ने बताउनुभयो । कार्यक्रममा वडा नं. ५ का अध्यक्ष राजकुमार वाइबाले उहाले मानव जीवनमा शिक्षाको महत्व धेरै भएकाले वैज्ञानिक शिक्षा प्रदान गर्नु आजको आवश्यकता रहेको भन्दै पालिका स्तरीय प्रतिस्पर्धाले प्रतिभा उत्पादन हुने बताउनु भयो । उहाँले गाउँपालिकाले विभिन्न गतिविधि छुट्टा छुट्टै वडाहरुमा गरिदैजाने नीति लिएकोमा यी २ प्रतियोगिता आफ्नो वडामा सञ्चालन गरेको जानकारी दिनुभयो । कार्यक्रममा आत्माविकास माध्यमिक विद्यालयका व्यवस्थापन समिति अध्यक्ष जगत तामाङले कार्यक्रम सफल पार्न सहयोग पुर्‍याउनुहुने सबैलाई धन्यवाद दिनुभयो । कार्यक्रममा गाउँपालिका उपाध्यक्ष तारा राना तिमल्सिना, वडा नं. २ का अध्यक्ष पुरुषोत्तम तिमल्सिना, ६ नं. वडाका अध्यक्ष विष्णु तामाङ, बेथानचोक गाउँपालिका शिक्षा शाखा प्रमुख पुष्पा राइलगायतको उपस्थिति रहेको थियो ।

ढुंखर्क । बेथानचोक गाउँपालिकाका ३ वटा विद्यालयका विद्यार्थीहरुलाई उद्घोषण तथा सार्वजनिक भाषण कलासम्बन्धि तालिम दिइएको छ ।
लायन्स क्लब अफ काठमाण्डौं प्रोस्पेरिटी तथा पार्वती माध्यमिक विद्यालयको संयुक्त आयोजनामा सञ्चालित तालिममा ३ वटा विद्यालयका विद्यार्थीहरुलाई तालिम दिइएको पार्वती माध्यमिक विद्यालयका प्रधानाध्यापक गोविन्द प्रसाद शर्माले जानकारी दिनुभयो । उहाँले विद्यार्थीहरुको बहुआयामिक विकासका लागि बिदाको समयमा यस प्रकारका तालिम सञ्चालन गरिएको जानकारी दिनुभयो । तालिमको समापन कार्यक्रममा प्रमुख अतिथिको रुपमा बोल्दै बेथानचोक गाउँपालिका वडा नं. २ का अध्यक्ष पुरुषोत्तम तिमल्सिनाले जीवनपयोगी तालिम सञ्चालन गरेकोमा विद्यालयलाई धन्यवाद दिनुभयो । व्यक्तित्व विकास तथा प्रभावकारी सञ्चारका लागि वक्तृत्वकला मानव जीवनको अभिन्न पाटो रहेकोले तालिमले विद्यार्थीहरुको क्षमता अभिवृद्धिमा टेवा दिने विश्वास व्यक्त गर्नुभयो ।

उहाँले यसप्रकारका कार्यक्रमलाई वडा कार्यालयले पनि सहयोग गर्दै जाने बताउनुभयो । साथै अभिभावक शिक्षालाई पनि सँगै लान वडा अध्यक्ष तिमल्सिनाले विद्यालयलाई सुझाव दिनुभयो ।
कार्यक्रममा विद्यालय व्यवस्थापन समितिका अध्यक्ष कुमारप्रसाद घिमिरेले किताब भन्दा बाहिर पनि सिकाइका विविध आयाम हुुने भएकाले विद्यार्थीको क्षमता अभिवृद्धिका लागि यस प्रकारका गतिविधिलाई तालिका नै बनाएर अघि बढ्ने बताउनुभयो ।
सरस्वती माध्यमिक विद्यालय, पार्वती माध्यमिक विद्यालय र पार्वती माध्यमिक विद्यालय गरी तीनवटा विद्यालयका ३८ जना विद्यार्थीहरु तालिममा सहभागि थिए ।

दुंखर्क । नेपाल सरकारबाट नमूना विकासका लागि छनोट भएको दक्षिणी काभ्रेको अग्रणी सामुदायिक विद्यालय पार्वती माध्यमिक विद्यालये आफ्नो ६४औं वार्षिकोत्सव एक कार्यक्रमबीच भव्य रुपमा सम्पन्न गरेको छ ।
बेथानचोक गाउँपालिकाका अध्यक्ष भगवान अधिकारीको प्रमुख आतिथ्यतामा सम्पन्न कार्यक्रममा अध्यक्ष अधिकारीले व्यक्ति विकासको प्रमुख आधार भनेको शिक्षा भएको बताउनुभयो । उहाँले शिक्षाले भाषाभाषी, भेषभुषा र सांस्कृतिक मौलिक परम्पराका साथै सामाजिक, आर्थिक क्षेत्रलाई साथै एक सभ्य, नैतिकवान् र चरित्रवान् बनाउने भएकोले स्थानीय सरकारले शिक्षा विकासमा दिगो लगानी गर्नुपर्ने बताउनुभयो । अध्यक्ष अधिकारीले शिक्षाले समाज, अर्थतन्त्र, सँस्कृति र राजनीति कसैलाई पनि बलियो बनाउन सकेन भने शिक्षामा लगानी नपुगेको हुन सक्ने भएकोले शिक्षामा लगानी गर्न राज्य कटिवद्ध हुनु पर्नेमा जोड दिनुभयो । एक प्रसंगमा उहाँले पूर्वीय शैक्षिक पद्धति अब्बल रहेकोले त्यसलाई वर्तमानको मागसँग ‘फ्यूजन’ गर्दै जानुपर्ने आवश्यकता औल्याउनुभयो । यसका लागि गाउँपालिकाले घुम्ती शिक्षकको व्यवस्था, विद्यार्थीहरुसँग अध्यक्ष लगायतका कार्यक्रम गरिदैँ आएको बताउनुभयो ।
कार्यक्रममा विशिष्ट अतिथी गाउँपालिकाकी उपाध्यक्ष तारा राना तिमल्सिनाले माध्यमिक तहसम्मको शिक्षाको जिम्मेवारी स्थानीय सरकार सञ्चालन ऐन २०७४ अनुसार स्थानीयस्तरमा नै दिएकोले निजी विद्यालयमुखी वर्तमान समयलाई चुनौति दिनेगरी शिक्षा प्रदान गर्न शिक्षक शिक्षिकाहरुलाई आग्रह गर्नुभयो । सामुदायिक विद्यालयमा विद्यार्थी घटनुमा शिक्षा क्षेत्रका नकारात्मक पक्षहरु धेरै जिम्मेवार भएकाले आफ्ना छोराछोरी निजीमा पठाएर सामुदायिक विद्यालय जाने परिपाटीको अन्त्य नभएसम्म शिक्षामा परिवर्तन आउन कठिन हुने उहाँको तर्क थियो । कार्यक्रममा गाउँपालिकाका पूर्व अध्यक्ष प्रेमबहादुर तिमल्सिनाले मानव विकास, सुशासन, आर्थिक, भौतिक, सामाजिक विकास र खुशीपनका मानकहरुलाई माथि लैजान शिक्षामा दिगो लगानी गर्दै जानुपर्ने बताउनुभयो ।
सो अवसरमा वि.सं. २०६६ सालमा विद्यालयले आयोजना गरेको सप्ताह ज्ञान महायज्ञमा रु १०,०००।– भन्दा माथि चन्दादान गर्नु हुने चन्दादाता, जग्गादाता, अक्षयकोषदाताहरुको शिलालेखको गाउँपालिकाका अध्यक्ष एवम् कार्यक्रमका प्रमुख अतिथि अधिकारीले अनावरण गर्नु भएको थियो । यस्तै विद्यालयलाई ११ आना जग्गा प्रदान गर्नु हुने जग्गादाताहरु रघुनाथ तिमल्सिना, केशवप्रसाद तिमल्सिना, लक्ष्मी तिमल्सिना र राजेन्द्र तिमल्सिनालाई सम्मान गरिएको थियो भने विद्यालयको वर्षभरीका विविध गतिविधिमा विशेष योगदान दिनुहुने महानुभावहरुलाई पनि सम्मान गरिएको थियो । यस्तै, कार्यक्रममा विद्यालयबाट सेवानिवृत्त शिक्षक बाबुराम तिमल्सिनालाई शैक्षिक क्षेत्रमा पु¥याएको योगदान बापत कदर पत्र सहित सम्मान, विभिन्न अक्षयकोषदाताबाट स्थापना गरिएका अक्षयकोषबाट ३६ जना विद्यार्थीलाई छात्रवृत्ति वितरण, विद्यालयमा कार्यरत उत्कृष्ट वर्ष शिक्षक सम्मान, कक्षा १२ सर्वाेत्कृष्ट पुरस्कार लगायतका सम्मान तथा पुरस्कार प्रदान गरिएको थियो । यस्तै एस.इ.इ. सर्वाेत्कृष्ट पुरस्कार अन्तर्गत विद्यालयका प्रधानाध्यापक गोविन्द प्रसाद शर्माद्वारा आफ्ना पिता स्वर्गीय खगनाथ शर्मा एवम् माता स्वर्गीय भिमकला शर्माको स्मृतिमा स्थापित सर्वाेत्कृष्ट विद्यार्थी पुरस्कार नगद रु. १० हजार राशीबाट एस.इ.इ. २०७९ मा सर्वाेत्कृष्ट हुने अविना तिमल्सिना र अमृत तिमल्सिना पनि सम्मानित हुनु भएको छ । यस्तै विद्यालयका पूर्व शिक्षक प्रदिप खतिवडाद्वारा आफ्ना स्वर्गीय माता ढकमाया खतिवडाको स्मृतिमा स्थापित कक्षा १२ सर्वाेत्कृष्ट विद्यार्थी पुरस्कार नगद रु. ५ हजारबाट यस वर्ष प्रकाश थोकर सम्मानित हुनु भएको छ ।

कार्यक्रममा विद्यालयको गतिविधिबारे जानकारी, वार्षिक कार्ययोजना पेश गर्दै विद्यालयका प्रधानाध्यापक गोविन्दप्रसाद शर्माले विद्यालयको ६४ औँ वार्षिकोत्सव समारोहमा पाल्नुभएका सम्पूर्ण अभिभावक, शिक्षक, विद्यार्थी, चन्दादाता, पूर्व विद्यार्थी, समाजसेवी, बुद्विजिवी, एवं उपस्थित समस्त शुभचिन्तक सरोकारवाला महानुभावहरुलाई धन्यावाद व्यक्त गर्नुभयो । कार्यक्रममा विद्यालयको ६४ औँ वार्षिकोत्सवको अवसरमा आयोजित अतिरिक्त क्रियाकलाप अन्तर्गत विविध खेलकुद प्रतियोगितामा प्रथम, द्वितीय, तृतीय एवम् सान्त्वना स्थान हासिल गर्नु हुने विद्यार्थीहरुलाई ट्रफी, मेडल र प्रमाणपत्र वितरण गरिएको थियो । कार्यक्रममा जनप्रतिनिधिहरु, दलीय प्रतिनिधिहरु, पूर्व शिक्षक, वि.व्य.स. शि.अ.स.का पूर्व पदाधिकारी लगायत अभिभावकहरुको बाक्लो उपस्थिति थियो । कार्यक्रम विद्यालय व्यवस्थापन समितिका अध्यक्ष कुमार प्रसाद घिमिरेको सभापतित्वमा सम्पन्न भएको थियो ।

ढुंखर्क । बेथानचोक गाउँपालिका न्यायिक समितिको आयोजनामा सञ्चालित नयाँ मेलमिलापकर्ता उत्पादन तालिम सम्पन्न भएको छ । फागुन २ देखि ९ गतेसम्म सञ्चालित तालिममा गाउँपालिकाका ६ वटै वडाका गरी ३० जनालाई तालिम दिइएको न्यायिक समिति संयोजक एवं उपाध्यक्ष गाउँपालिकाकी उपाध्यक्ष तारा राना तिमल्सिनाले जानकारी दिनुभयो ।

बुधबार तालिमका सहभागीहरुलाई प्रमाण पत्र वितरण गर्दै उहाँले तालिम लिएसँगै संवादका माध्यमबाट समाधान खोज्न सक्नु पर्ने धारणा राख्नुभयो । उहाँले स्थानीय सरकार सञ्चालन ऐन, २०७४ ले व्यवस्था गरेको न्यायिक समितिले विवाद निरुपण गर्ने अधिकार राख्ने मात्र नभई नागरिकमा न्याय घरदैलोसम्म पु¥याई सामाजिक सदभाव कायम गर्ने भएकाले समाजमा विद्यमान समस्याहरुलाई मिलाउने भएकाले मेलमिलापकर्ताहरुले मुद्दा मिलिसकेपछि तुषका खाटा समेत नबस्ने खालको वातावरण सिर्जना हुनेगरी काम गर्नुपर्ने धारणा राख्नुभयो । चालु वर्षमा जिल्लाका १३ वटै स्थानीय पालिकामध्ये न्याय सम्पादनमा बेथानचोक पहिलो भएकोमा उहाँले खुशी व्यक्त गर्नुभयो । यस आर्थिक वर्षमा कूल ३६ वटा मुद्दा आएकोमा १० वटा मौखिक मिलान भएका, २६ वटा मुद्दा दर्ता भएका, १० वटा मिलापत्र भएको, ८ वटा निर्णय फैसला भएको, २ वटा डिसमिस भएका, एउटा खारेज भएको, २ वटा मुद्दा फिर्ता भएको र ३ वटा मुद्दा चालु रहेको उहाँले जानकारी दिनुभयो ।

कार्यक्रममा गाउँपालिकाका प्रशासकीय अधिकृत राजेन्द्र भण्डारीले समितिलाई दिएको क्षेत्राधिकारको प्रभावकारी प्रयोग, अपनाउने कार्यविधिको मापदण्ड, स्वच्छ सुनुवाइ र निष्पक्ष भूमिका निर्वाह गर्न तालिमका सहभागीहरुलाई आग्रह गर्नुभयो । उहाँले सुशासनका गतिविधिहरुमा बेथानचोक गाउँपालिका काभ्रेका गाउँपालिकाहरुमा पहिलो स्थानमा रहेको बताउनु भयो । यस्तै जिल्ला भरीको सुशासन, सेवाप्रवाह, भौतिक पूर्वाधार, आर्थिक प्रशासन लगायतका मापनहरुमार्फत हुने संस्थागत स्वमुल्यांकन (लिजा) मा जिल्ला मै नगर र गाउँपालिकाहरुमा प्रथम भएको बताउनु भयो ।

कार्यक्रममा मुख्य प्रशिक्षक रमिला हुमागाईले सबैले जित्ने वातावरण बनाएर काम गर्न र फाटेका सम्बन्धनाई सियोले झैं जोडेर राख्ने वातावरण बनाउन आग्रह गर्नुभयो । सहभागिका कैलाश तिमल्सिनाले तालिमले कतिपय नबुझेका कुरामा स्पष्टता मिलेको बताउनुभयो । सो अवसरमा गाउपालिकाका कुनै पनि वडामा विवाद नहोस् भन्ने कुरामा गाउँपालिका प्रतिवद्ध रहेको बताउँदै तालिममा सिकेको ज्ञानले समाजमा हार्दिकताका साथ मेलमिलाप कायम राख्न, समुदायस्तरमा न्यायिक मेलमिलापका लागि कार्य गर्न सहज होस् भन्ने उद्देश्यले तालिमको आयोजना गरिएको न्यायिक शाखा प्रमुख श्री कृष्ण तिमल्सिनाले बताउनुभयो । कार्यक्रममा वडा अध्यक्ष एवम् न्यायिक समिति सदस्य कुबेर ढकाल, न्यायिक समिति सदस्य एवं कार्यपालिका सदस्य दिल कुमारी तामाङ लगायतको उपस्थिति रहेको थियो । तालिमको सहजीकरण शान्तिका लागि सहकार्य संस्था, नेपालले गरेको थियो ।

गोलगाउँ / बेथानचोक गाउँपालिका वडा नं. ६ स्थित गोलगाउँमा रहेको बालउन्नति आधारभूत विद्यालयले आफ्नो स्थापनाको ६४औ दिवस विविध कार्यक्रम बीच मनाएको छ ।

विद्यार्थीहरुले विभिन्न प्रतिभा प्रस्तुत गरेका कार्यक्रममा वर्ष भरीमा विभिन्न गतिविधिमा उत्कृष्टता हासिल गर्ने विद्यार्थीहरुलाई वडा अध्यक्ष बिष्णु तामाङले पुरस्कार वितरण गर्नु भएको थियो । सो क्रममा उहाँले वडा भरीका विद्यालयहरुलाई शिक्षण सिकाइसँगै अतिरिक्त क्रियाकलापमा जोड दिन आग्रह गर्नुभयो । सामुदायिक विद्यालयका शैक्षिक गतिविधिमा गाउँपालिकाले लगानी थप्दै गएकोले भावी दिनहरुमा पनि लगानी थप्दै जाने विश्वास दिलाउँदै थप मिहेनत गर्न शिक्षकहरुलाई आग्रह गर्नुभयो ।

अभिभावकलाई पनि विभिन्न गतिविधिमा संलग्न गराईएको कार्यक्रममा विद्यालयकी प्रधानाध्यापक रेखा रानाले आफ्नो प्रतिवेदन पेश गर्नुभएको थियो । उहाँले सिमित साधन स्रोतका विच उत्कृष्ट शिक्षण सिकाइका  लागि आफूहरु प्रतिवद्ध रहेको बताउनु भयो । विद्यालय व्यवस्थापन समिति अध्यक्ष रामबहादुर तामाङले वार्षिकोत्सव समारोहले अभिभावकलाई विद्यालयसम्म ल्याउन मौका मिलेको र अभिभावकको जमघट हुने प्रकारका गतिविधि समय समयमा गरिदै जाने बताउनुभयो । कार्यक्रममा विद्यालय व्यवस्थापन समिति र शिक्षक अभिभावक समितिका पदाधिकारी तथा अभिभावकहरुको उपस्थिति रहेको थियो ।

बेथानचोक गाउँपालिकामा रहेको पार्वती बहुमुखी क्याम्पसले आफ्नो ११औ स्थापना दिवस विविध कार्यक्रम गरी मनाएको छ ।

गाउँपालिकाका अध्यक्ष भगवान अधिकारीको प्रमुख आतिथ्यतामा भएको कार्यक्रमलाई सम्बोधन गर्दै उहाँले गाउँपालिककाकै गौरवको रुपमा रहेको एकमात्र क्याम्पसले नयाँ वर्षारम्भ गरेकोमा शुभकामना दिनुभयो ।
ग्रामिण भेगमा रहेको क्याम्पसका आफ्नै किसिमको समस्या हुने भन्दै त्यसका अलावा,दिनानुदिन विद्यार्थीहरु विदेशिने समस्याले भावी दिनहरुमा चुनौति बढ्ने बताउनुभयो । उहाँले शिक्षाले व्यवहारमा परिवर्तन ल्याउनु पर्ने भन्दै जीवनपयोगी शिक्षा दिन क्याम्पस टिमलाई आग्रह गर्नुभयो । उहाँले गाउँपालिकाले क्याम्पसका लागि लगानी थप्ने बताउँदै सिकाउने खालको जाँगरिलो पौरखी शिक्षा अबको गन्तव्य हुनु पर्नेमा जोड दिनुभयो । दैनिक जीवनमा प्रयोग गर्ने खालको शिक्षाले शिक्षालयको वातावरण, विद्यार्थीको जीवनपद्धति र अनुभवलाई सम्बोधन गर्ने भएकोले आफू पनि क्याम्पससँग सहकार्य गर्न तयार रहेको बनाउनुभयो ।
क्याम्पस सञ्चालक समिति अध्यक्ष विनोद तिमल्सिनाको सभापतित्वमा भएको कार्यक्रममा क्याम्पस प्रमुख प्रताप कार्कीले क्याम्पसका गतिविधि र भावी कार्ययोजना प्रस्तुत गर्नु भएको थियो ।
कार्यक्रममा बेथानचोक गाउँपालिका पूर्व अध्यक्ष प्रेम बहादुर तिमल्सिना, प्राध्यापक संघ बागमती प्रदेश सह–संयोजक, सह प्राध्यापक काभ्रे बहुुमुखी क्याम्पसका अध्यापक माधव प्रसाद तिमल्सिना, अग्रज पत्रकार तथा काभ्रे बहुमुखी क्याम्पसका सह प्राध्यापक इश्वरी ओझा,संस्थापक क्याम्पस प्रमुख एवं पार्वती माध्यमिक विद्यालयका प्रधानाध्यापक गोविन्द शर्मा लगायतले क्याम्पसको प्रगतिको शुभकामना व्यक्त गर्नु भएको थियो । कार्यक्रममा बेथानचोक गाउँपालिकाका प्रमुख प्रशासकीय अधिकृत राजेन्द्र भण्डारी, बेथानचोक गा.पा. वडा नं. २ को अध्यक्ष, एवम् क्याम्पसका स्व.वि.यु. सभापति, पुरुषोत्तम तिमल्सिना वडा नं. १ को अध्यक्ष मधुसुदन तिमल्सिना, वडा नं. ५ को अध्यक्ष राजकुमार वाईबा, बेथानचोक गा.पा. वडा नं. ६ को अध्यक्ष विष्णु तामाङ, विभिन्न वडाका सदस्यहरु, जग्गा दाता, चन्दा दाता, अभिभावक, विभिन्न संघ संस्थाका प्रतिनिधि लगायतको उपस्थिति रहेको थियो । कार्यक्रममा वी.एड तथा वि.वि.एस. उत्तीर्ण विद्यार्थीहरु, जग्गा दाता, चन्दा दाता, पूर्व अध्यापक, वर्ष शिक्षक लगायतका विधामाहरुमा सम्मान गरिएको थियो ।

बेथानचोक गाउँपालिका वडा नं. ४ का किसानहरुलाई सुन्तला खेती सम्बन्धि २ दिने तालिम प्रदान गरिएको छ ।
गाउँपालिकाको कृषि विकास शाखाको आयोजनामा ४० जना किसानहरुलाई उक्त तालिम दिइएको कृषि विकास शाखा प्रमुख मधुसुदन दाहालले जानकारी दिनुभयो । गाउँपालिकाको सुन्तला प्रवद्र्धन कार्यक्रम अन्र्तगत वडा नं. ४ को सभाहलमा दिइएको तालिममा कृषि विकास कार्यालय काभ्रेकी बाली संरक्षण अधिकृत रमा कार्की र बागबानी विकास केन्द्र पाँचखालका अधिकृत उमेश सापकोटाले सहजीकरण गर्नु भएको थियो ।

कार्यक्रमबारे प्रष्ट पार्दै बेथानचोक गाउँपालिका वडा नं. ४ का अध्यक्ष कृष्ण बहादुर लामाले बगैंचामा बोटहरु सुक्ने, मर्ने फलको गुणस्तरमा कमी आउने जस्ता समस्या किसानले भोग्नु नपरोस, सुन्तलाजात फलफूलको स्वस्थ बगैंचावाट राम्रो उत्पादन दिंदै आइरहेको बोटहरुले केही वर्ष पछि नै रोग ग्रस्त लक्षणहरु देखाई क्रमिक रुपले फल सानो हुने भै उत्पादन घट्ने र केही वर्ष पछि नै बगैंचा अनुत्पादित हुने र बोट मर्न सक्ने हुँदा किसानलाई समयमै जानकारी गराउन गाउँपालिकाले तालिमको आयोजना गरेको बताउनुभयो ।

बेथानचोक गाउँपालिका कृषि विकास शाखा प्रमुख मधुसुदन दाहालले बगैंचाको स्थापना भएको स्थानको भौगोलिक विशेषता, स्याहार–सम्भार, मल–जल, रोग–किरा आदि राम्रो ब्यवस्थापन गरे किसानले सुन्तला खेतिबाट राम्रो लाभ लिन सक्ने बताउनु भयो । उहाँले सुन्तलाजात फलफूल बगैंचामा देखा पर्ने यस प्रकारको समस्या नै सुन्तलाजात फलफूल बगैंचा मासिएर जाने कारण भएको हुँदा गाउँपालिकाले यस क्षेत्रमा किसान सचेतिकरण गर्दै आइरहेको बताउनु भयो । उहाँले सुन्तलाका लागि बेथानचोकको वडा नं. ४ र आसपासका क्षेत्र उर्वर भएका कारण किसानले सुन्तालाको खेतिमा मिहेनत गर्दा राम्रो लाभ लिन सक्ने बताउनुभयो । उहाँका अनुसार फल झर्ने समस्या न्यूनिकरणका लागि गाउँपालिकाको कृषि शाखा र वडाले किसानलाई किटनाशक औषधि र बिरुवाका लागि प्रोटिन ब्रेट वितरण गरिरहेको छ । यस्तै सुन्तला खेति बगैचा निर्माणका लागि आगामी असारमा ५ हजार बिरुवा किसानहरुलाई बाड्ने तय गरिएको पनि उहाँले जानकारी दिनुभयो । गाउँपालिकाले गत वर्ष पनि किसानहरुलाई प्रोटिन ब्रेट वितरण गरेको थियो ।

बेथानचोक गाउँपालिकामा काभ्रेपलान्चोक जिल्ला अदालतको आयोजनामा “समुदायमा अदालत सम्बन्धि कार्यक्रम” सम्पन्न भएको छ ।

कार्यक्रमलाई सम्बोधन गर्दै काभ्रे जिल्ला अदालतका न्यायाधीश राजेन्द्र नेपालले न्याय सम्पादनमा बेथानचोक गाउँपालिका जिल्लाकै अग्र स्थानमा रहेकोमा धन्यवाद दिँदै अरू पालिकाहरूले पनि बेथानचोकको अनुसरण गर्नुपर्ने बताउनुभयो । कार्यक्रममा उहाँले सहभागीहरूको कानुनी समस्य समाधान गर्ने कानुन उपायहरू प्रस्तुत गर्नु भएको थियो । उहाँले प्रस्तुत कार्यक्रममा अदालतबाट न्यायिक समितिको अनुगमन तथा निरीक्षण हुँदा न्यायिक कामकाज कार्यविधीगत रूपमा ऐन नियमको पालन गरी काम कारबाही भएकोप्रति प्रशंसासमेत गर्नुभयो ।

कार्यक्रमकै क्रममा काभ्रे जिल्ला अदालतका श्रेस्तेदार कर्णबहादुर राईले समुदाय–अदालतसम्बन्धि प्रशिक्षण दिनु भएको थियो । जसमा कार्यपालिका सदस्य, मेलमिलापकर्ता र अन्य सरोकारवालाहरूको उपस्थित रहेको थियो । काभ्रे जिल्ला अदालतका अन्य उपस्थित कर्मचारीहरूसमेतले उक्त कार्यक्रममा सहजीकरण गर्नु भएको थियो ।

कार्यक्रममा जिल्ला अदालतबाट न्यायिक समितिको अनुगमन तथा निरीक्षण गर्न आउनु भएका न्यायाधीश नेपालको नेतृत्वमा सहभागीलाई गाउँपालिका अध्यक्ष भगवान अधिकारी, उपाध्यक्ष तारा राना तिमल्सिना र प्रमुख प्रशासकीय अधिकृत राजेन्द्र भण्डारीले स्वागत गर्नु भएको थियो ।

समापन कार्यक्रमलाई सम्बोधन गर्दै गाउँपालिकाकी उपाध्यक्ष एवम् न्यायिक समिति संयोजक तारा राना तिमल्सिनाले जिल्ला अदालतबाट हुने अदालती काम कारवाही र प्रक्रियाबारे स्थानीय तहमै आएर जिल्ला अदालत काभ्रेपलाञ्चोकले गरेको कार्यक्रमको प्रशंसा गर्नुभयो । उहाँले यस प्रकारका कार्यक्रमहरूले सहजै कानुनी पहुँचको जानकार नभएका व्यक्तिहरूले पनि मेसो पाउने भएकोले कार्यक्रम फलदायी रहेको जीकिर गर्नुभयो । उहाँले न्यायिक समितिको निरीक्षण र सुपरीवेक्षण गरी गाउँपालिकाले गरेको राम्रो काम र अभ्यासले प्रशंसा पाएकोप्रति खुशी व्यक्त गर्नुभयो । गाउँपालिकाका सबै वडाहरूले गाउँपालिकाको न्यायिक समितिबाट सहज ढंगले सेवा पाएको पनि बताउनुभयो ।

बेथानचोक गाउँपालिकामा चालु वर्षमा न्यायिक समितिमा कूल २६ वटा मुद्दा दर्ता भएकोमा २२ वटा फछ्र्यौट भएको र ४ वटा मुद्दा चालु रहेको गाउँपालिकाका न्यायिक शाखा प्रमुख श्रीकृष्ण तिमल्सिनाले जानकारी दिनुभयो ।

बेथानचोक गाउँपालिका र भूमिमाता युवा क्लबको आयोजनामा सेभेन ए साइड पाँचौ बेथानचोक अध्यक्ष कप वडास्तरीय फुटबल प्रतियोगिता २०८० को गाउँपालिका अध्यक्ष भगवान अधिकारीले वडा नं. ४ मा अवस्थित तिप्चोक खेल मैदान एक कार्यक्रमबीच उद्घाटन गर्नु भएको छ ।

कार्यक्रमलाई सम्बोधन गर्दै अध्यक्ष अधिकारीले गाउँपालिका भित्रका प्रतिभाहरुबीच प्रतिस्पर्धा गराउँदै प्रतिभाहरु उत्पादन गर्न यस प्रकारका प्रतियोगिताहरुले सहयोग पुग्ने बताउनु भयो । खेलकुदको विकास र वडा स्तरबाटै खेलप्रतिको रूचि बढाउन गाउँपालिकाले खेलकुदमा लगानी गरेको बताउँदै विभिन्न प्रतियोगिताहरू सञ्चालन गर्दै आइएको बताउनु भयो । राष्ट्रको गौरव, सान, मान, पहिचान स्थापित गर्न खेलकुदले महत्वपूर्ण भूमिका निर्वाह गर्ने भएकोले गाउँपालिकाले खेलकुदका लागि लगानी गरिहने बताउनुभयो ।

कार्यक्रममा बेथानचोक गाउँपालिका खेलकुद शाखा प्रमुख सिताराम तिमल्सिनाले कुशल अनुशासित स्वास्थ्य शरीर, स्वास्थ्य मस्तिष्क भएको नागरिक उत्पादन गराउन खेलकुदले महत्वपूर्ण भूमिका निर्वाह गर्ने बताउनु भयो । उहाँले भन्नुभयो, “खेलाडी देशको राष्ट्रिय सम्पत्ति हो । खेलकुदको विकास र खेलको वातावरणका लागि खेल पूर्वाधार महत्वपूर्ण हुन्छ । यसका लागि गाउँपालिकाले खेलको प्रवद्र्धनका लागि, खेलकुद पूर्वाधारको विकासका लागि विभिन्न गतिविधि गर्दै आइरहेको छ ।”
स्वास्थ्य नै धन हो, तर धन स्वास्थ्य होइन । स्वस्थ गराउन खेलकुद महत्वपूर्ण छ । एउटा मान्छेका लागि खेलको महत्वलाई बुझ्न सकिएन भने त्यो मानसिक रूपले वा शारीरिक रूपबाट अपांग बन्नपुग्छ । खेलकुद क्षेत्रको विकासले सामाजिक एकता र समृद्धिको आधारशीला तयार पार्ने यस प्रकारका प्रतियोगिता आवश्यक रहेको तिमल्सिनाको भनाई थियो ।

असोज २८ देखि शुरुभई १६ वटा टिम सहभागी सो प्रतियोगिता कार्तिक ३ गतेसम्म चल्ने आयोजक भूमिमाता युवा क्लबका अध्यक्ष माइते तामाङले बताउनु भयो । उहाँका अनुसार बिजेता टिमले ६० हजार नगद, ट्रफि, मेडल र प्रमाणपत्र पाउने छ । यस्तै उपबिजेता टिमले ३० हजार नगद, ट्रफि, मेडल र प्रमाणपत्र पाउने अध्यक्ष तामाङले जानकारी दिनुभयो । यस्तै बेष्ट प्लेयर, हाइ स्कोरर, बेष्ट डिफेण्डर तथा म्यान अफ दि सिरिजलाई पनि नगदद्वारा पुरस्कृत गरिने जानकारी दिनुभयो ।

प्रतियोगिता अन्तर्गत उद्घाटन खेलमा वडा नं. ४ का सदस्य कर्ण तामाङले एन्फा रेफ्रीद्वय राम श्रेष्ठ र जयज नरसिंह श्रेष्ठलाई बल हस्तान्तरण गर्नु भएको थियो । प्रतियोगितामा भूमिमाता गौरीशंकर र सलान्दु बगर टिमबीच भएको प्रतिष्पर्धामा भूमिमाता गौरिशंकरले १ का विरुद्ध ६ गोलअन्तरले स्पर्धा आफ्नो पोल्टोमा पारेको छ । भूमिमाता गौरीशंकरका लागि कृष्ण तामाङले २, गणेश तामाङ, विनय तामाङ, दिवस तामाङ र बुद्ध तामाङले १–१ गोल गर्नुभयो । सलान्दुबगरका लागि सान्त्वना गोल पेमा लामाले गर्नुभयो ।