दिपेन्द्र कार्की बस्ताकोटी, दैलेख
पौष ८,२०८१
अपांगता भएका व्यक्तीहरु पनि यहि समाजका नागरिकहरु हुन । विशेष क्षमता र पहिचान भएका उनिहरु देश समाज र परिवारका लागि केहि गर्न चाहन्छन तर उनिहरुलाई सहयोगको आवश्यकता छ । उनिहरुका भावनाको कदर गरिनु आजको आवश्यकता पनि हो ।
दैलेखको दुल्लु नगरपालिकाका अपांगता भएका व्यक्तीहरुले सरोकारवालाहरुसँग विशेष छलफल गर्दै आफ्ना आवाजहरु सुनिदिनका लागि अनुरोध गरेका छन । शारिरिक र मानसिक रुपमा अपांगता भएका व्यक्तीहरुले जनप्रतिनिधि ,राजनैतिक दल, संघसंस्थाहरु लगाएत सरोकारवालाहरुको ध्यान केन्द्रित गरेका छन ।
सरोकारवालाहरुको बसाईको क्रममा उनिहरुले आफुहरुलाई समाजले स्विकार गर्न नसकेको सन्दर्भ उठान गर्दै आफुहरुलाई अपमान गर्ने गरेको सन्दर्भलाई विशेष चासोका साथ उठान गरेका छन ।
उक्त छलफलमा सहभागी सरोकारवाला व्यक्तीहरुले उनिहरुको भावनालाई स्विकार गर्न सक्नुपर्नेमा जोड दिएका छन । साथै अपांगता भएका व्यक्तीहरुलाई राज्यका अन्य नागरिकहरु भन्दा बढि सहयोगको खाँचो रहेको भन्दै प्राथमिकताका साथ व्यवस्थापन गर्नुपर्ने धारणा राखेका छन । कार्यक्रममा सहभागी प्रमुख अतिथि जिल्ला समन्वय दैलेखका प्रमुख नमराज शाहीले अपांगता भएका व्यक्तीहरुको हक अधिकारका लागि राज्य नै सचेत हुनुपर्नेमा जोड दिदैँ संविधानमा तोकिएको बमोजिम राज्यले व्यवसथापन गर्नुपर्ने बताउनुभयो ।
उक्त कार्यक्रमको अवसरमा बोल्दै दुल्लु नगरपालिका उपप्रमुख बिना कार्कीले नगरपालिका स्तरबाट हरेक वर्ष अपांगता भएका व्यक्तीहरुको क्षमता अभिवृद्धिका साथै उनिहरुलाई विभिन्न शिपमुलक तालिम लगाएत व्यवस्थापनका कामहरु भईहरेको बताउनुभयो ।
कार्यक्रममा विजया मावि दुल्लुका प्रधानाध्यापक केशव बहादुर भण्डारी लगाएत सरोकारवालाहरुको सहभागिता रहेको थियो ।
कार्यक्रमलाई सोसेक नेपालले व्यवस्थापन र सहयोग गरेको थियो भने सहजीकरण सोसेक नेपालका हरिकला खड्काले गर्नुभएको थियो ।
दिपेन्द्र कार्की बस्ताकोटी, दैलेख
पौष ८,२०८१
दैलेखको भैरवी गाउँपालिकामा सरुवा तथा मौसमी रोगको स्वास्थ्य परिक्षण शिविर सञ्चालन गरिएको छ । सोसेक नेपालको आयोजना र एईआइएन संगको साझेदारीमा भैरवी गाउँपालिकाको केन्द्रमा रहेको भैरीकालिकाथुम स्वास्थ्यचौकीमा उक्त शिविर सञ्चालन गरिएको हो । दुर्गम भैरवीका स्थानियहरुको सामान्य रोग देखी यतिबेलाको हिउँदे समयमा चिसोबाट हुने संक्रमणबाट हुने स्वास्थ्य समस्यालाई मध्यनजर गर्दै दुल्लु अस्पतालका डाक्टरहरुद्धारा शिविरमा सहभागि स्थानियको स्वास्थ्य परिक्षण गरिएको छ ।
स्वास्थ्य शिविरको उद्धघाटनको अवसरमा बोल्दै भैरवी गाउँपालिका उपाध्यक्ष देवी भण्डारीले गाउँपालिका विगत देखी नै जनताको स्वास्थ्यमा सजक रहेको भन्दै यतिबेलाको बदलिदो हावापानी र चिसोबाट वृद्धवृद्धाहरु र बालबालिकाहरुमा देखिने समस्यालाई न्युनिकरण का लागि एक दिने शिविरले पनि ठुलो उपलव्धी हाँसिल हुने भन्दै स्वास्थ्य परिक्षण शिविरको आयोजना गरिएको बताउनुभयो ।
स्वास्थ्य शिविर सञ्चालनको क्रममा भैरवी गाउँपालिका वडा नं.४,५,७ का वडाध्यक्ष, जनप्रतिनिधिहरु, सवास्थ्यकर्मीहरु लगाएत कर्मचारीहरुको उपस्थितिमा भैरवी गाउँपालिका स्वास्थ्य शाखा प्रमुख शम्शेर बहादुर विष्टले कार्यक्रम सञ्चालन गर्नुभएको थियो ।
स्वास्थ्य परिक्षण शिविरमा भैरवी गाउँपालिकाका सबै वडाका करिब ५०० भन्दा बढि नागरिकहरुले सेवा लिने अपेक्षा गरिएको छ।
