दिपेन्द्र कार्की बस्ताकोटी, दैलेख
१३ फाल्गुन,२०८१

दैलेखको दुल्लु नगरपालिका वडा नं. १२ ले वmडाभित्र सञ्चालित विभिन्न खानेपानी योजनाहरुलाई दिगोपना सँगै निरन्तर सुचारुका लागि सार्वजनिक सुनुवाई कार्यक्रम सम्पन्न गरेको छ । वडाले सोसेक नेपाल मार्फत हेल्वेटास नेपालसँगको सहकार्यमा सञ्चालित विभिन्न लिफ्टिगं खानोपानी आयोजना र अन्य खानेपानीका योजनाहरुको गुणस्तरका लागि खानेपानी उपभोक्ताहरु लगाएत समितिका पदाधिकारीहरु र सरोकारवालाहरु सहितको सार्वजनिक सुनुवाई कार्यक्रम आयोजना गरेको हो ।
वडाभित्र यतिबेला करिब ८ वटा खानेपानी आयोजनाहरु सञ्चालनमा छन भने जसबाट करिब ६०० घरधुरीमा ७०० धाराहरु जडानबाट २३०० नागरिकहरु प्रत्यक्ष खानेपानीको पहुँचबाट लाभान्वित भएको बताइएको छ । सार्वजनिक सुनुवाई कार्यक्रमको अवसरमा वडाध्यक्ष लिलाराम लम्सालले समग्र खानेपानी योजनाहरुको सन्दर्भमा वार्षिक प्रतिवेदन प्रस्तुत गर्दै नागरिकहरुको खानेपानी समस्या समाधानका लागि विभिन्न संघसंस्थाहरुसँग सहकार्य गर्दै एक घर एक धारा अभियान सञ्चालन भईरहेको जानकारी गराउनुभयो ।
उक्त सार्वजनिक सुनुवाई कार्यक्रमको अवसरमा सहभागि विभिन्न खानेपानी योजनाका प्रमुख तथा प्रतिनिधिहरुले योजनाको वर्तमान अवस्थाको सन्दर्भमा वस्तुगत प्रतिवेदन प्रस्तुत गरेका छन भने सहभागि स्थानियबासी खानेपानी उपभोक्ताहरुले प्रश्न, जिज्ञासा लगाएत सल्लाह सुझाव समेत राखेका छन । कार्यक्रममा दुल्लु नगरपालिका उपप्रमुख बिना कार्कीले नागरिकहरुले सार्वजनिक जनचासोका विषयहरुमा जनप्रतिनिधिहरुसँग खुलेर कुरा गर्नुपर्ने भन्दै त्यसको सहजिकरणमा आफुहरु सदैव तयार रहेकोमा जोडदिनुभयो ।
उक्त सार्वजनिक सुनुवाई कार्यक्रमको अवसरमा वडाभित्रका खानेपानी योजनाहरुलाई दीर्घकालिनरुपमा सुचारुका लागि साझा प्रतिवद्धतामा हस्ताक्षर समेत गरिएको छ ।
