दिपेन्द्र कार्की बस्ताकोटी, दैलेख
२७ असार ,२०८२
दैलेखको दुल्लु नगरपालिकाले आफ्नो वार्षिक सार्वजनिक सुनुवाई कार्यक्रम सम्पन्न गरेको छ । जिल्ला प्रशासन कार्यालय दैलेख, जिल्ला प्रहरी कार्यालय दैलेख कार्यालयसंग संयुक्त रुपमा आयोजित उक्त सार्वजनिक सुनुवाई कार्यक्रम जिल्लाकै एक विशेष कार्यक्रमको रुपमा रहेको थियो । जिल्ला प्रशासन कार्यालय दैलेख र जिल्ला प्रहरी कार्यालय दैलेख र दुल्लु नगरपालिकाद्धारा त्रिपक्षिय रुपमा सञ्चालन गरिएको वार्षिक सार्वजनिक सुनुवाई कार्यक्रमको अवसरमा जिल्ला स्थित विभिन्न सेवाप्रदायक कार्यालयको समेत सहभागिता रहेको थियो ।
संघ, प्रदेश र जिल्ला लगाएत स्थानिय तहको संयुक्त आयोजित उक्त सार्वजनिक सुनुवाई कार्यक्रममा दैलेखका प्रमुख जिल्ला अधिकारी बद्रीनाथ गैह््रे , जिल्ला प्रहरी कार्यालय दैलेखका प्रमुख प्रहरी नायव उपरिक्षक गणेश बहादुर बराल र दुल्लु नगरपालिका प्रमुख भरत प्रसाद रिजाल प्रमुख जवाफदेहि वक्ताको रुपमा रहनुभएको थियो भने अन्य विभिन्न कार्यालयका प्रमुखहरु समेत जवाफदेहि वक्तको रुपमा रहनुभएको थियो । सार्वजनिक सुनुवाई कार्यक्रमको अवसरमा जिल्ला प्रशासन कार्यालय दैलेख, जिल्ला प्रहरी कार्यालय दैलेख र दुल्लु नगरपालिकाको वार्षिक प्रगति प्रतिवेदन समेत प्रस्तुत गरिएको छ ।
सार्वजनिक सुनुवाई कार्यक्रमको अवसरमा सहभागि सेवाग्राहीहरुले जिल्ला स्थित विभिन्न कार्यालयको सेवाप्रवाह लगाएत विकास निर्माणको सन्दर्भमा प्रश्न , सल्लाह सुझाव, जिज्ञासा समेत राखेका थिए । सेवाग्राहीहरुले राखेका प्रश्न र जिज्ञासाहरुको सम्बन्धित जवाफदेहि वक्ताहरुले सहजिकरण गर्दै जवाफ दिनुभएको थियो ।
सार्वजनिक सुनुवाई कार्यक्रमको अवसरमा सहभागि स्थानियबासी सेवाग्राहीहरुले शिक्षा, स्वास्थ्य, खानेपानी, विद्युतिकरण ,सडक लगाएत नागरिकता, राहदानी, राष्ट्रिय परिचयपत्रको सन्दर्भमा प्रश्न गर्दै सल्लाह सुझाव समेत प्रदान गरेका थिए ।
