दिपेन्द्र कार्की बस्ताकोटी, दैलेख
२६ जेठ,२०८२
मृत्युसँग दिनप्रतिदिन लडिरहेका दैलेखको भैरवी गाउँपालिका वडा नं. १ रावतकोट गैराखाडीका २७ वर्षिए कुल बहादुर सुनारले जीवन बचाउको अपिल गरेका छन । एउटा दलित समुदायको गरिब परिवारका उनि काम र मजदुरीको लागि भारतको गुजरातमा गएको बेला एक्कासी क्यान्सरको सिकार बन्न पुगे । बुढो बुवा, श्रीमती र एक नावालक छोराको सहारा कुलबहादुर सिमित उपचार पश्चात थप उपचार गर्ने अवस्था नभएको र काम पनि गर्न नसक्ने अवस्थामा घर फर्किए पछी उनको हाल उपचार हुन सकिरहेको छैन ।
घाँटीमा गलाको क्यान्सर भएका उनको छाति चिरेर मासु प्रत्यारोपण गरेसँगै क्यान्सर रोगका लागि किमो चढाउने क्षमता नभएपछि घर आएको र यतिबेला कुनै शिप नलागेपछि दिन रात छटपटाइरहेका छन । सहयोग माग्न कहाँ जाने, कता जाने , अनि कोहि कसैको सहारा नपाएका उनि राज्यसँग समेत जीवन बचाउको भिक मागिरहेका छन ।
त्यसो त कुलबहादुरका बुढा बा र श्रीमतीलाई कुनै बाटो थाह छैन । छोरा नाबालक छन । कमाउन गएका छोरा एवं श्रीमान रोग सँगै मृत्युको भारी बोकेर घर फर्किएसँगै उनिहरुका दुःखका दिन झन थपिए । उनिहरुले पनि सानो सानो सहयोग गरेरै भएपनि छोराको उपचार र जीवन बचाउको माग गरेका छन ।
संगै कुल बहादुरका छिमेकीहरुले समेत सहयोगी मनहरुले सहयोग गरेको खण्डमा ठुलो पुण्य हुने भन्दै राज्य स्तरबाट समेत यस्ता सहाराविहिन पिडितहरुलाई राहत उपलव्ध गराउनुपर्ने बताएका छन ।
जता गहिरो उतै पहिरो भने झै रोगले पनि गरिव तथा दीनदुःखीहरुलाई नै पिँडा थपेपछी अबिरल आँशु रोकिएका छैनन् । राज्य स्तरबाट समेत यस्ता व्यक्तीहरुको लागि विशेष व्यवस्थापन गर्नुपर्ने आवश्यकता छ भने अर्कोतिर पुण्य कमाउन कुनै मन्दिर जानुको साटो यस्ता व्यक्तीहरुका सानो सहयोग गर्नु ठुलो धर्म हुन्छ ।
