२८ माघ २०८१
दैलेखको दुल्लु नगरपालिकाद्वारा सञ्चालित राष्ट्रपति रनिंग सिल्ड खेलकुद प्रतियोगिता आज सम्पन्न भएको छ । गत माघ २५ गते एक औपचारिक कार्यक्रमका बिच उद्धघाटन गरिएको उक्त खेलकुद प्रतियोगिता आज एक औपचारिक कार्यक्रमका बिच सम्पन्न भएको हो । विगत लामो समय देखी हुन नसकेको उक्त खेलकुद प्रतियोगिता यतिबेला उल्लासमय वातावणमा भव्यरुपमा सम्पन्न भएको छ । दुल्लु खेलकुद विकास समितिको संयोजनमा दुल्लु नगरपालिकाद्वारा सञ्चालित उक्त खेलकुद प्रतियोगिताको आयोजक विद्यालयको रुपमा श्री विजया नमुना माध्यामिक विद्यालय दुल्लु रहेको थियो ।
दुल्लु नगरपालिका भित्रका विभिन्न १८ वटा विद्यालयहरुले सहभागिता जनाएको उक्त खेलकुद प्रतियोगितामा करिब ४७० जना छात्र छात्राहरुले १५ विद्याको खेलकुदमा ३० स्वर्णपदकका लागि प्रतिस्पर्धा गरेका थिए । जस अनुसार सबैभन्दा बढि पदकका साथ सिल्ड आयोजक एवं दुल्लु नगरपालिकाको ठुलो विद्यालयको रुपमा रहेको श्री विजया माध्यामिक विद्यालयले हात पारेको छ । जस अन्तरगत विजया माध्यामिक विद्यालयले १० स्वर्ण,४ रजत र ३ कास्य सहित १७ पदक हात पारेको छ भने भलिवलमा समेत उत्कृष्ट खेल प्रदर्शन गरेको छ । दोस्रोमा श्री सरस्वती देवी माध्यामिक विद्यालय विनायक रहेको छ ।
सिल्ड र मेडल ग्रहण गर्दै विजया माध्यामिक विद्यालयका प्रधानाध्यापक केशव वहादुर भण्डारीले यो समग्र दुल्लुको जित भएको बताउनुभयो । उहाँले आयोजकको रुपमा विद्यालय जिम्मेवारी लिनु र उपलव्धी समेत हात पार्नु समग्र विद्यालय र विद्यार्थीहरुको अथक मेहनत सँग जोडिएको विषयवस्तु भएको प्रतिक्रिया दिनुभयो ।
