दिपेन्द्र कार्की बस्ताकोटी, दैलेख
१८ फाल्गुन,२०८१
दैलेखको नौमुले गाउँपालिकाले मर्यादित महिनावारी, छाउपडी र वालविवाह न्युनिकरणका लागि प्यानल छलफल कार्यक्रम सम्पन्न गरेको छ । महिला सशक्तिकरण मञ्ज नेपाल दैलेखको सहजिकरणमा नौमुले गाउँपालिकाले वर्तमान समयमा गाउँपालिका क्षेत्र भित्र बढ्दै गइरहेको बालविवाह न्युनिकरण लगाएत छाउपडि लगाएत महिनावारीलाई कसरी मर्यादित बनाउन सकिन्छ भन्ने उद्धेश्यका साथ उक्त छलफल कार्यक्रमलाई अगाडी सारेको हो ।
विगत द्धन्दकालमा नराम्रोसँग थला परेको नौमुले गाउँपालिकाको धेरैजसो क्षेत्र जनजातिहरुको बसोबास हुनुका साथै अशिक्षा र अज्ञानताका कारण अहिले पनि छाउपडि लगाएत वालविवाह कायम हुनुका साथै महिनावारी अथवा छुई प्रथालाई सामाजिक कुरितिका रुपमा लिने गरिएको छ । महिनावारी हुदाँ घरमा बसे देउता रिसाउने मान्यताका साथ छाउपडि कायम छ भने सानै उमेरमा विवाह गर्नाले विभिन्न समस्याहरु निम्तिने गरेको सन्दर्भमा महिला सशक्तिकरण मञ्च नेपाल दैलेखले उक्त कार्यक्रम आयोजना गरिएको बताएको छ । कार्यक्रमको अवसरमा बोल्दै नौमुले गाउँपालिका अध्यक्ष छबिराम सुवेदीले विगत समयको तुलनामा केहि वालविवाह लगाएत कुरितिहरु केहि विस्तारै न्युनिकरण भएपनि सोचे अनुरुपको उपलव्धी नभएको धारणा राख्नुभयो ।
त्यसैगरि कार्यक्रममा उठेका सवालहरुलाई सहजिकरण गर्दै उपाध्यक्ष गंग बहादुर शाहीले वालविवाह , वहुविवाह, छाउपडी र असुरक्षित महिनावारी को सन्दर्भ उच्च भएको भन्दै त्यसको न्युनिकरणका लागि गाउँपालिका स्तरबाट विविध कार्यक्रमहरु सञ्चालन गरिएको बताउनुभयो ।
उक्त प्यानल छलफलको क्रममा नौमुले गाउँपालिका क्षेत्रका विद्यालयका वालवालिकाहरु, महिला समुहका सदस्यहरु, किशोरकिशोरी समुहका सदस्यहरु लगाएत जनप्रतिनिधिहरु र सरोकारवालाहरुको सहभागिता रहेको थियो भने कार्यक्रमलाई नेपाल टेलिभिजनका दैलेख प्रतिनिधि एवं नेपाल पत्रकार महासंघ कर्णाली प्रदेशका अध्यक्ष विष्णु शर्माले सहजीकरण गर्नुभएको थियो ।
