दिपेन्द्र कार्की बस्ताकोटी, दैलेख
१९ फाल्गुन,२०८१
भेडाबाख्रामा लाग्ने पिपिआर रोग विरुद्धको खोप आजबाट दैलेखमा सप्ताहव्यापी अभियानको रुपमा सुरु गरिएको छ । जिल्ला पशु अस्पताल एवं पशु सेवा कार्यालय दैलेखले जिल्लाका ११ वटै स्थानिय तहमा उक्त अभियान सञ्चालन गरेको छ । सबै स्थानिय तहका विभिन्न वडाहरुमा आज एकैसाथ उक्त अभियानको सुरुवात गरिएको छ । अभियानको क्रममा जिल्ला भित्रका करिब दुई लाख भेडा बाख्राहरुमा पिपिआर रोग विरुद्धको खोप सञ्चालन गरिने जिल्ला पशु अस्पताल एवं पशुसेवा कार्यालय दैलेखले जनाएको छ ।
दैलेखको दुल्लु नगरपालिका १ को बाख्रीमोडमा खोप अभियानको सुरु गर्दै जिल्ला पशु अस्पताल एवं पशुसेवा कार्यालय दैलेखका प्रमुख प्रचण्ड खड्काले सन् २०३० सम्म नेपालबाट पिपिआर रोग उन्मुलन गर्दै नेपालका भेडबाख्राहरु निरोगी हुनुका साथै मासुजन्य पदार्थको लागि योग्य छन भन्ने सन्देश दिनका लागि उक्त अभियान हरेक वर्ष सञ्चालन गर्ने गरिएको बताउनुभयो ।
यसका साथै अभियानको क्रममा गाई, गोरु, सुंगुर बंगुर लगाएत पशुपंछिहरुमा समेत विविभन्न खोप र औषधि खुवाउनुका साथै कुखुराहरुमा लाग्ने रानिखेत रोगको औषधि खुवाउने कार्यक्रम समेत अभियानको रुपमा सञ्चालन हुनेछ ।
