दिपेन्द्र कार्की बस्ताकोटी, दैलेख
२४ फाल्गुन,२०८१
दैलेखको चामुण्डाबिन्द्रासैनी नगरपालिकाले आफ्नो स्थापनाको ८औँ वार्षिकोत्सव विविध कार्यक्रम सहित सम्पन्न गरेको छ । लोकतान्त्रिक गणतन्त्रमा देश संघियतामा गईसके पछि २०७३ फाल्गुन २७ गते घोषणा भएका देशका अन्य स्थानिय तहहरु मध्ये चामुण्डाबिन्द्रासैनी नगरपालिका पनि एक हो । दैलेखमा रहेका ११ वटा स्थानिय तहहरुमा फरक पहिचान बोकेको र मिलेको भुभागमा अवस्थित चामुण्डाबिन्द्रासैनी नगरपालिकाले पहिलो पटक आफ्नो स्थापना दिवस मनाएको हो ।
चामुण्डाबिन्द्रासैनी नगरपालिकाको केन्द्र जम्बुकाँध बजारमा प्रभात फेरी सहित पञ्चबाजाको झाँकी सहित औपचारिक रुपमा सुरुभएको उक्त कार्यक्रमको अवसरमा जिल्ला स्थित विभिन्न पालिकाका प्रमुखहरु, राजनैतिक दलका प्रमुख प्रतिनिधिहरु , नगरपालिकाका वर्तमान निवर्तमान जनप्रतिनिधिहरु लगाएत स्थानियबासीहरुको उल्लेख्य सहभागिता रहेको थियो । उक्त स्थापना दिवसको कार्यक्रमलाई दैलेख क्षेत्र नं. २ का प्रतिनिधिसभा सदस्य दिक्पाल कुमार शाहीले औपचारिक रुपमा उद्घाटन गर्नुभएको थियो । उद्धघाटन कार्यक्रमको अवसरमा बोल्दै प्रतिनिधिसभा सदस्य शाहीले समग्र चामुण्डाबिन्द्रासैनीबासीका साझा समस्याहरु पुरा गर्न र संवृद्ध स्थानिय तह निर्माणका लागि सबै जनप्रतिनिधिहरु कर्मचारीहरु एक भएर लाग्नुको विकल्प नभएको बताउनुभयो । उहाँले नगरपालिकाको ८औँ वार्षिकोत्सव समारोहलाई शुभकामना व्यक्त गर्दै समग्र दैलेख क्षेत्र नं. २ को विकासका लागि आफु सदैव दिगो ज्यानका साथ लागिपरेको समेत बताउनुभयो । उहाँले चुनाविताका बोलेका बचनहरुलाई अहिले पनि बिर्सिन नसकेको र भोलिका दिनमा आफ्नो कार्यकाल इतिहासमा सम्झिन लायक बनाउने समेत सांसद शाहीको तर्क रहेको थियो ।
